(閱讀全文)

7月2日(星期日)，去左東平洲玩徒潛，我地一行六人(亨利、Jenny、Sam、Patrick、Dilys、我)，本來CC、呆呆、24都話黎，不過CC之前一日玩船，好累，所以放過佢~至於呆呆同24，已經榮升左做飛機王，要放飛機~都早一日通知呀，竟然果朝七點幾打黎話唔去，亨~太過份啦~

算~講返果日o既行程…我哋約左8:00am係大學站美心等，其實之前成個星期都落雨，都有d擔心。一到美心，就開始落雨添，心諗…咁點算，有考慮過放棄or改地點，但大家都無意見，個天又停左雨有太陽喎，咁米照去囉~死就死吧~ 

9:00am上船，大約10:30到達。天清氣朗，正呀~我地跟隨Jenny去到間士多裝身。好快手咁就落海啦，不過唔係咁多野睇，於是就游去碼頭附近…嘩~d魚多到呢，游到去邊都有呀，但品種就比較少~而潛到碼頭底，簡直有夜潛探險o既感覺，好好玩~游過左碼頭，重有好多品種古怪o既硬珊瑚添，真係好得意。 

我地玩到大約一點，就係醫肚o既時間啦~Jenny又發揮佢o既本領，整左d紙包蛋糕比我哋，重有分朱古力味同藍莓味添，真係好正，同Jenny出去，真係唔怕餓死~

我哋休息到大概3:00又再出發，今次我地向碼頭o既反方向行，去到一個超靚沙灘，又無咩人喎，藍天碧海，我地影左好多張相，先落海睇野，啊~d水好濁喎，唉~下午天，遇正大流，能見到極差，雖然見到好多魚影，但都睇唔真…不過Jenny見到鯊魚喎，佢話我知果陣，心情勁興奮，又驚又想睇，我哋一路係度搵，越潛越深，越黎越緊張，不過水太濁啦，完全睇唔到~嗚~可惜… 之後大家都覺得無咩野睇，決定改地點，向碼頭方向再遠啲o既地方，今次係一個石灘，因為潮退關係，好多硬珊瑚外露，要搵地方落海都唔容易，落到海，d水都係好濁，不過有一大片海葵~我哋玩左一陣就打道回府啦，沖埋身，食埋豆腐花，約5:40就去碼頭等船啦~

呢個時候，個天特然勁黑，一大片烏雲吹埋黎，有種打到黎o既感覺，我地一上船，狂風大驟雨就黎啦，忽然覺得自己好lucky，玩完先落雨…嘻嘻~不過回程時間好耐，成兩粒鐘，係船度瞓到周身骨痛，之後同Patrick、亨利食日本野，完結今日o既旅程… 

東平洲真係好靚，有機會要再去，下次要早d去珊瑚區度睇，相信會正好多~

攝影：閒人亨利

PHOTO←朋友們，想睇相就按這裏啦~

今次d魚少左好多，係簡唔中有一群二三十隻遊過，同埋見到d食得o既海膽(唔係海刺，d針短好多)，聽講話六月就唔比捕魚，所以d人趁依家捉魚喎~唉~無計，祈求黎緊o既日子啦~

玩完水之後，我地去左cafe同carol慶祝生日，本來都想比個驚喜佢，點知係個蛋糕上之前，有個侍應走黎問，個蛋糕係米要上...我xyz佢呀...咁就比carol識穿左啦，不過佢都係好開心o既，我地重玩左好多game~好攪笑~

p.s.我係落水前比隻毒蚊針左一下，依家已經有一個網球咁大啦，嗚~無陰公呀~

攝影：閒人亨利